АКАФИСТ ПРЕСВЯТЕЙ БОГОРОДИЦЕ В ЧЕСТЬ ИКОНЫ ЕЯ «ВЗЫСКАНИЕ ПОГИБШИХ», значение и иторрия иконы

Икона Пресвятой Богородицы Взыскание Погибших

Икона Пресвятой Богородицы «Взыскание Погибших»

Кондак 1

Взбранной Воеводе победительная, яко избавльшеся от вечныя смерти благодатию от Тебе рождшагося Христа Бога нашего и Твоим Матерним пред Ним ходатайством, благодарственная восписуем Ти, раби Твои, но яко имущая державу непобедимую, от всяких нас бед и скорбных обстояний свободи, зовущих:

Радуйся, Благодатная Богородице Дево, погибших Взыскание и всех скорбящих Радосте.

Икос 1

Ангел предстатель послан бысть с Небесе рещи Богородице: радуйся, Благословенная в женах, предреченная Мати Христа, Сына Божия. Темже и мы, грехми обремененнии, надежду спасения в Тебе улучивше, умильно взываем Ти:

Радуйся, Божие ко грешным благоволение; радуйся, кающихся пред Господем Богом крепкое заступление.

Радуйся, падшаго Адама воззвание; радуйся, слез Евиных избавление.

Радуйся, греховную отъемлющая скверну; радуйся, бане, омывающая совесть.

Радуйся, рождшая Избавителя, беззакония наша милостиво очищающаго; радуйся, всечудное всех к Богу примирение.

Радуйся, мосте, воистинну преводяй нас от смерти к животу; радуйся, мир от потопа греховнаго спасшая.

Радуйся, лествице небесная, Еюже Господь к нам сниде; радуйся, вина всех обожения.

Радуйся, Благодатная Богородице Дево, погибших Взыскание и всех скорбящих Радосте.

Кондак 2

Видяще токи чудес, изливаемыя от святыя Твоея иконы, Благая Богородительнице, и разумеюще, яко Ты еси молящихся Благая Помощница, обидимых Заступница, ненадеющихся надежда, печальных утешение, погибших Взыскание, алчущих Кормительница, нагих одеяние, девственных целомудрие, странных Наставница, труждающихся помощь, слепых прозрение, глухих благослышание, больных исцеление, благодарственне вопием о Тебе Богу: Аллилуиа.

Икос 2

Тайну Твоего, Богородице, заступления людей, в скорби погибающих, уразумети хотяще, к Тебе прибегаем, о Мати и Дево. Ты же, яко Благая, научи ны разумети в защищении Благаго Сына Твоего милосердое промышление о спасении душ наших и очищение многих согрешений, да взываем Ти радостно:

Радуйся, обуреваемых тихое пристанище; радуйся, сумнящихся известное утверждение.

Радуйся, Едина Мати милосердия; радуйся, скорая Помощнице сущим в бедах и напастех.

Радуйся, скорбьми грехи наша очищающая; радуйся, печалию наша немощи душевныя врачующая.

Радуйся, суетныя радости презирати нас научающая; радуйся, к вышнему миру ум наш возводящая.

Радуйся, от любве земныя к Небесней Божией любви нас привлекающая; радуйся, в самых страданиих наших утешение и благодатную жизнь нам подающая.

Радуйся, обетование благ вечных; радуйся, Ходатаице вечныя радости.

Радуйся, Благодатная Богородице Дево, погибших Взыскание и всех скорбящих Радосте.

Кондак 3

Силою свыше укрепи мя, Благая Владычице, недугующа телом и душею, и посещения Твоего сподоби и промышления, мрак уныния и скорби, облежащий мя, отгоняющи, да, спасаемый Тобою, присно воспою Богу: Аллилуиа.

Икос 3

Имущи богатство милосердия неизреченное, всем скорбящим руку помощи простираеши, недуги врачующи, страсти исцеляющи. Не презри и мене, Благая Владычице, на одре немощи моея низлежаща и вопиюща Ти:

Радуйся, милости сокровище многоценное; радуйся, отчаянных едина надеждо.

Радуйся, тела моего врачевание; радуйся, души моея спасение.

Радуйся, твердая крепосте немощных; радуйся, изнемогающих Заступнице и укрепление.

Радуйся, гнев Божий Твоим молением скоро утоляющая; радуйся, страсти наша силою молитв Твоих укрощающая.

Радуйся, слепых зрение, глухих слышание; радуйся, хромых хождение, немых глаголание.

Радуйся, болящих благонадежное посещение; радуйся, яко Тобою, по мере веры, подаются благодатная исцеления всем немощствующим.

Радуйся, Благодатная Богородице Дево, погибших Взыскание и всех скорбящих Радосте.

Кондак 4

Буря многих бед и напастей обдержит мя, и волнения уже не терплю. Ты же, яко Милостивая Мати Спаса моего и Бога, воздвигни руце к Сыну Твоему, молящи Его, да призрит на лютую скорбь сердца моего и воздвигнет мя из пучины отчаяния, вопиющаго Ему: Аллилуиа.

Икос 4

Слышащи, Пресвятая Дево и Мати, Симеона праведнаго проречение: «Тебе же Самой душу продет оружие», — слагала еси в сердце Твоем вся глаголы сия, разумевающи, яко радость матерняго сердца о чадех многих печалей в мире сем причастна. Темже, яко искушенней по всяческим и спострадати матерней скорби могущей, взываем Ти:

Радуйся, радость миру, Христа Спасителя, рождшая; радуйся, мир от скорбей избавляющая.

Радуйся, поношение Сына Твоего терпевшая; радуйся, страданием Его спострадавшая.

Радуйся, скорбных матерей утешение; радуйся, чад их благодатное охранение.

Радуйся, в бедах скорое нам заступление; радуйся, заблуждших исправление.

Радуйся, младенцев питание; радуйся, юных наставление.

Радуйся, Мати сиротствующих; радуйся, вдов заступление.

Радуйся, Благодатная Богородице Дево, погибших Взыскание и всех скорбящих Радосте.

Кондак 5

Боготочную Кровь Сына Твоего на Кресте за спасение наше изливаемую зрящи, яко Раба Господня, повинующися воли Отца, Иже на Небесех, нам образ злострадания и терпения явила еси, да и мы, в пещи искушений и бед сущии, вопием смиренно Богу: Аллилуиа.

Икос 5

Видя Тя Сын Твой и Бог, при Кресте стоящую с возлюбленным учеником и сердцем Ему сраспинающуюся, глагола: «Жено, се сын Твой», и ученику: «Се, Мати твоя», всыновляя Тебе вся верующия в Него. Мы же, яко общницы скорби и страданий Сына Твоего, имеюще в Тебе Благую Матерь, на Тя все упование в скорби возлагающе, вопием Ти:

Радуйся, Мати рода христианскаго; радуйся, усыновившая нас при Кресте Сына Твоего.

Радуйся, Бога с человеки соединившая; радуйся, верных Господеви сочетавшая.

Радуйся, Агнице, рождшая Агнца, вземшаго грехи мира; радуйся, чаше, черплющая нам радость от Источника безсмертия.

Радуйся, Споручнице спасения грешных; радуйся, Взыскание погибших.

Радуйся, нечаянная грешных Радосте; радуйся, падших возстание.

Радуйся, Целительнице всех немощей; радуйся, утоление всякия печали.

Радуйся, Благодатная Богородице Дево, погибших Взыскание и всех скорбящих Радосте.

Кондак 6

Проповедуют милости Твоя, Богомати, вси концы вселенныя, ибо честным покровом Твоим покрываеши весь род христианский, о немже присно молишися Христу Спасителю нашему и избавляеши от всех бед благонравныя и богобоящияся люди Твоя, верно вопиющия Богу: Аллилуиа.

Икос 6

Возсия благодать светозарная от пречудныя иконы Твоея, Богомати, пред неюже со слезами припадающе, молим Ти ся: отжени облак нашедших на ны искушений, да вопием Ти радостно:

Радуйся, приносящая к Сыну Твоему и Богу моления верных; радуйся, и Сама у Престола Сына Твоего присно молящаяся о нас.

Радуйся, Предстательнице к Богу, мир от бед спасающая; радуйся, Заступнице рода христианскаго, от Бога нам дарованная.

Радуйся, древо благосеннолиственное, имже покрываются мнози; радуйся, древо светлоплодовитое, имже питаются вернии.

Радуйся, покрове миру, ширший облака; радуйся, земле обетования, из неяже течет мед и млеко.

Радуйся, ниво, растящая обилие щедрот; радуйся, Подательнице всякия благости.

Радуйся, Благодатная Богородице Дево, погибших Взыскание и всех скорбящих Радосте.

Кондак 7

Хотящи явити токи чудес от святыя иконы Твоея «Взыскание погибших», повелела еси, Владычице, в погибели и печали сущим молебная пения пред тою совершати и получившим исцеление проповедати милости, ради тоя иконы явленныя, да не сокрыт будет источник благодатных врачеваний всем требующим. Темже и мы не таим Твоих благодеяний, но, благодарственне прославляюще Бога, вопием Ему: Аллилуиа.

Икос 7

Новая купель Силоамская паче оныя древния явися, Пречистая Владычице, храм Твой, в немже поклоняемся чудотворней иконе Твоей, ибо не единою в лето и токмо первее входящим здравие телом подаеши, но всякий недуг и всякую язву душевную и телесную врачуеши с верою и любовию к Тебе прибегающих. Сего ради вопием Ти:

Радуйся, купеле, в нюже вся скорби наша погружаются; радуйся, чаше, еюже радость и спасение восприемлем.

Радуйся, каменю, напояющий жаждующия жизни; радуйся, древо, услаждающее сланыя воды житейскаго моря.

Радуйся, животворныя воды неистощимый Источниче; радуйся, бане, омывающая греховную скверну.

Радуйся, скорбей наших услаждение; радуйся, печалей наших утоление.

Радуйся, демонов попрание; радуйся, врагов посрамление.

Радуйся, Благодатная Богородице Дево, погибших Взыскание и всех скорбящих Радосте.

Кондак 8

Странники и пришельцы вси есмы на земли сей, по глаголу апостолову, беды от врагов, беды от сродник, беды от лжебратии терпяще в лишениих многих и скорбех. Ты же, Владычице, яко Благая Путеводительница, настави нас к тихому пристанищу и моли Сына Твоего прощению прегрешений нам прежде конца дароватися, да присно вопием Богу: Аллилуиа.

Икос 8

Все житие наше на земли болезненно и печали исполнено от клеветы, досаждения, укорения и иных многовидных бед и напастей, немощствует бо тело, изнемогает и дух наш. К Тебе убо прибегаем, Богомати, пред пречистою иконою Твоею припадающе, исполни радости и веселия скорбная сердца наша, да вопием Ти:

Радуйся, Путеводительнице, к Небесному отечеству нас руководящая; радуйся, Царице Неба и земли, врата райская нам отверзающая.

Радуйся, Милостивая, нас милующая; радуйся, Домостроительнице, житие наше добре устрояющая.

Радуйся, руно орошенное, еже Гедеон предвиде; радуйся, блаженное чрево, невместимаго всеми Бога вместившее.

Радуйся, Неопалимая Купино; радуйся, Нерушимая Стено.

Радуйся, Живоносный Источниче; радуйся, Цвете Неувядаемый.

Радуйся, умягчение сердец злых; радуйся, умиление благих.

Радуйся, Благодатная Богородице Дево, погибших Взыскание и всех скорбящих Радосте.

Кондак 9

Всякая житейская в мире сем сладость печали бывает причастна: слава не стоит, богатство мимотечет, лепота и здравие увядают, друзи и искрении смертию отъемлются. Услади убо наша скорби, благих Виновная, Твою нетленную дающи радость нам, вопиющим Богу: Аллилуиа.

Икос 9

Витии многовещаннии недоумеют, киими словесы скорбящия и погибающия утешати, но Сама, Владычице, возглаголи сердцам нашим утешение, благодати Твоея лучами облак скорби нашея и мрак уныния разгоняющи, да взываем Ти:

Радуйся, обрадовавшая надеянием на Тя всех христиан; радуйся, Радосте и умирение миру.

Радуйся, Подательнице Божественныя благости; радуйся, Надеждо благ вечных.

Радуйся, кораблю хотящих спастися; радуйся, пристанище житейских плаваний.

Радуйся, верная Хранительнице уповающих на Тя по Бозе; радуйся, одеждо нагих дерзновения.

Радуйся, Хранительнице всех и утверждение; радуйся, всех верных ограждение и священное прибежище.

Радуйся, помоще верно молящихся Тебе; радуйся, светлое благодати познание.

Радуйся, Благодатная Богородице Дево, погибших Взыскание и всех скорбящих Радосте.

Кондак 10

Спасти хотяй род человеческий от вечныя муки и непрестающия скорби, Человеколюбец Господь в приснодевственную утробу Твою вселися и Тебе, Матерь Свою, дарова погибающим в помощь, покров и защищение, да будеши печальным утешение, погибшим взыскание, скорбящим радование, отчаянным надежда, вечныя муки Своим ходатайством избавляющая и к Небесному веселию приводящая всех, верно вопиющих Сыну Твоему и Богу нашему: Аллилуиа.

Икос 10

Стена еси девам, Богородице Дево, и всем к Твоему покрову прибегающим. Темже молим Тя: заступи, покрый и соблюди всех погибающих и безпомощных от искушений, озлоблений и бед, Тебе с любовию взывающих:

Радуйся, столпе девства; радуйся, чистоты и целомудрия сосуде избранный.

Радуйся, воинствующим на плоть целомудрием изрядное венчание; радуйся, во иночестве благоскорбящим Подательнице вечнаго радования.

Радуйся, пламень страстей изменяющая; радуйся, мрак искушений прогоняющая.

Радуйся, Наставнице целомудрия; радуйся, чистоты ограждение.

Радуйся, человеков исправление; радуйся, Еюже от падения нашего возстахом.

Радуйся, твердое веры утверждение; радуйся, приятное молитвы кадило.

Радуйся, Благодатная Богородице Дево, погибших Взыскание и всех скорбящих Радосте.

Кондак 11

Пение всеумиленное приносим Ти, раби Твои, Богородице, яко всесильней Заступнице рода нашего. Утоли болезни к Тебе прибегающих, укроти гнев Божий, праведно на ны движимый грех ради наших, избави нас от всякия лютыя скорби и погибели, вопиющих о Тебе Богу: Аллилуиа.

Икос 11

Светоприемная свеща, углем благодати Божия возжженная, явися нам пречестная икона Твоя, Владычице, на освящение наше и утешение. Мы же, любовию чтуще ю и с верою припадающе к ней, вопием Ти:

Радуйся, сильным Твоим заступлением от всех бед нас избавляющая; радуйся, от труса и потопа нас защищающая.

Радуйся, от глада душевнаго и телеснаго нас снабдевающая; радуйся, огнь росою молитв Твоих угашающая.

Радуйся, от смертнаго губительства нас спасающая; радуйся, в бранех крепкая Помощнице.

Радуйся, от нашествия иноплеменных нас ограждающая; радуйся, от междоусобныя брани охраняющая.

Радуйся, плавающих легкое по водам прехождение; радуйся, путешествующих добрая Водительнице.

Радуйся, пленных свобождение; радуйся, от належащаго праведнаго прещения Божия скорое избавление.

Радуйся, Благодатная Богородице Дево, погибших Взыскание и всех скорбящих Радосте.

Кондак 12

Благодати залог восхотевши дати роду нашему, цельбоносную икону Твою явила еси нам, Богомати, от неяже токи чудес с верою приходящим источаются, недузи врачуются и скорби утоляются. Сего ради радостно о Тебе вопием Богу: Аллилуиа.

Икос 12

Поюще Твоя милости и чудеса, Богородительнице, хвалим Тя вси, яко твердую Предстательницу нашу, и со умилением поклоняемся Тебе, молящейся о нас, и просим: воздвигни руце к Сыну Твоему, да в сей жизни и по смерти нашей милосердие Его неотступно будет от нас, взывающих Ти:

Радуйся, непостыдное наше упование в житии и по преставлении нашем; радуйся, уповающим на Тя мирен конец жития сего подающая.

Радуйся, в день судный наша Надеждо и Защищение; радуйся, Судии Праведнаго умоление.

Радуйся, геены вечныя избавление; радуйся, Надеждо вечнаго спасения.

Радуйся, ключу Царствия Христова; радуйся, двере райская.

Радуйся, мосте, к Небесем преводяй; радуйся, всех кающихся грешников прибежище и Благая Заступнице.

Радуйся, Ангелов Радосте; радуйся, всех праведных Славо и Утешение.

Радуйся, Благодатная Богородице Дево, погибших Взыскание и всех скорбящих Радосте.

Кондак 13

О Всепетая Богообрадованная Мати, рождшая на радость Небу и земли Царя Христа, Бога нашего! Услыши глас скорбящих раб Твоих и, приемши сие малое моление наше, избави нас от всяких бед, скорбей и напастей, недуги наша исцели, клеветы потреби, всяку злобу и вражду отжени от нас и будущия изми муки о Тебе вопиющих: Аллилуиа.

Этот кондак читается трижды, затем 1-й икос «Ангел предстатель…» и 1-й кондак «Взбранной Воеводе…».

ТРОПАРЬ БОЖИЕЙ МАТЕРИ В ЧЕСТЬ ИКОНЫ ЕЯ ВЗЫСКАНИЕ ПОГИБШИХ

глас 7

Радуйся, Благодатная Богородице Дево,/ во объятиях Своих Предвечнаго Младенца и Бога носившая./ Проси Его дати миру умирение/ и душам нашим спасение./ Сын бо Тебе, Богомати, вещает,/ яко вся прошения Твоя во благое исполнит./ Сего ради и мы припадающе, молим Тя/ и надеющийся на Тя, да не погибнем,/ имя Твое именуем:/ Ты бо еси, Владычице,/ Взыскание погибших.

ТРОПАРЬ БОЖИЕЙ МАТЕРИ В ЧЕСТЬ ИКОНЫ ЕЯ ВЗЫСКАНИЕ ПОГИБШИХ

глас 4

Взыщи нас, погибающих, Пресвятая Дево, не по грехом бо нашим наказуеши нас, но по человеколюбию милуеши: избави нас от ада, болезни и нужды и спаси нас.

КОНДАК БОЖИЕЙ МАТЕРИ В ЧЕСТЬ ИКОНЫ ЕЯ ВЗЫСКАНИЕ ПОГИБШИХ

глас 6

Предстательство христиан непостыдное,/ ходатайство ко Творцу непреложное,/ не презри грешных молений гласы,/ но предвари, яко Благая, на помощь нас,/ верно зовущих Ти:/ ускори на молитву и потщися на умоление,/ предстательствующи присно, Богородице, чтущих Тя.

 

МОЛИТВА 1-Я

О, Пресвятая и Преблагословенная Дево, Владычице Богородице! Призри милостивым Твоим оком на нас, предстоящих пред святою иконою Твоею и со умилением молящихся Тебе, воздвигни нас из глубины греховный, просвети ум наш, омраченный страстьмй, и уврачуй язвы душ и телес наших. Не имамы иныя помощи, не имамы иныя надежды, разве Тебе, Владычице, Ты веси вся немощи и согрешения наша, к Тебе прибегаем и вопием: не остави нас Твоею Небесною помощию, но предстани нам присно и Твоим неизреченным милосердием и щедротами спаси и помилуй нас, погибающих. Даруй нам исправление греховныя жизни нашея и избави нас от скорбей, бед и болезней, от напрасныя смерти, ада и вечныя муки. Ты бо, Царице и Владычице, скорая Помощница и Заступница всем, притекающим к Тебе, и крепкое прибежище грешников кающихся. Подаждь убо нам, Преблагая и Всенепорочная Дево, христианский конец живота нашего, мирен и непостыден, и сподоби нас Твоим ходатайством вселитися в обителях Небесных, идеже непрестанный глас празднующих радостию славит Пресвятую Троицу, Отца, и Сына, и Святаго Духа, ныне, и присно, и во веки веков. Аминь.

 

МОЛИТВА 2-Я

Заступнице усердная, Благоутробная Господа Мати, к Тебе прибегаю аз, окаянный и паче всех человек грешнейший, вонми гласу моления моего, вопль мой и стенания усльппи, яко беззакония моя превзыдоша главу мою, и аз, якоже корабль в пучине, погружаюся в море грехов моих. Но Ты, Всеблагая и Милосердая Владычице, не презри мене, отчаяннаго и во гресех погибающего; помилуй мя, кающагося в злых делех моих, и обрати на путь правый заблуждшую окаянную душу мою. На Тебе, Владычице моя Богородице, возлагаю все упование мое. Ты, Мати Божия, сохрани и соблюди мя под кровом Твоим, ныне, и присно, и во веки веков. Аминь.

 

МОЛИТВА 3-Я

О Пресвятая Владычице и Богородице, высшая Херувим и честнейшая Серафим, Богоизбранная Отроковице, погибших Взыскание и всех скорбящих Радосте, подаждь утешение и нам, в погибели и скорби сущим, разве бо Тебе, иного прибежища и помощи не имамы. Ты Едина еси радости нашея Ходатаица и яко Матерь Божия и Мати Милосердия, предстоя у Престола Пресвятыя Троицы, можеши нам помощи: никтоже бо, притекаяй к Тебе, посрамлен отходит. Услыши убо и нас ныне, в день погибели и печали, пред Твоею иконою припадающих и со слезами Тебе молящихся: отжени от нас належащия на нас скорби и беды в сей временней жизни, не лишены же ны сотвори Твоим всесильным ходатайством и вечныя нескончаемыя радости в Царствии Сына Твоего и Бога нашего. Аминь.

Скачать —> 5 февраля: Служба Пресвятой Богородице ради иконы ее “Взыскание погибших” — 151,96 Кб

Источник — http://azbyka.ru/days/ikona-vzyskanie-pogibshih

Значение и История Иконы Божией Матери «Взыскание погибших»

Икона «Взыскание погибших» по преданию прославилась ещё в VI веке в малоазийском городе Адане.

В некоем архиерейском доме служил эконом — весьма честный и благочестивый человек. И вдруг его обвинили в том, что он нечист на руку, и выгнали. Обида так взыграла в иноке, что он возроптал на Бога и Богородицу и заключил союз с дьяволом, подписав с ним хартию. И вот уже на грани погибели он ужаснулся тому, что натворил, опомнился и стал думать, что делать. Тогда он затворяется в храме, не велит туда никого пускать и отчаянно молится перед образом Божией Матери, называя Ее «Взыскание погибших». Молитва была такой горячей, горе таким отчаянным, а раскаяние настолько глубоким и искренним, что Царица Небесная вняла просьбам Феофила (так звали инока) и, возвестив о прощении грехов, вернула подписанную им страшную хартию. Инок Феофил, достиг впоследствии высшего духовного совершенства и был прославлен Церковью в лике преподобных.

В России наиболее ранним считается образ, некогда находившийся в Георгиевском храме г.Болхова Орловской губернии, написанный, по преданию, в 1707 году.

Прославилась же икона позднее, в середине XVIII века. В селе Бор жил один благочестивый крестьянин Федот Алексеевич Обухов, любивший жертвовать деньги на украшение родного храма. Однажды, в день Крещения Господня, его настигла в пути страшная вьюга с сильным морозом. Вскоре до­рогу совсем замело. Лошадь выбилась из сил и остановилась у непроходимого оврага. Не видя средств к спасению, он выпряг лошадь, укутался, лег в сани и стал засыпать, не сознавая, что замерзает. Но и в эти страшные минуты он успел помолиться Богородице, мыс­ленно дав обет написать Ее икону «Взыскание погибших». В соседнем селении жил один крестьянин, приятель Обухова. И вот в завываниях вьюги он вдруг расслышал чей-то голос под окном: «Возьмите». Выйдя из дома, он увидел в санях своего старого друга Федота Обухова. Кто и как его привез – осталось тайною. По выздоровлении Обухов немедленно приступил к вы­полнению своего обета, С просьбой написать список с иконы Федот обратился к художнику из Болхова Гурову. Тот согласился написать образ, но назначил слишком высокую цену, однако был вразумлен настигшей его слепотой. Пообещав сделать работу за любую предложенную цену, Гуров прозрел. Особенностью этой иконы было изображение в ее верхней части «Крещения Господня» в память спасения крестьянина Обухова в этот праздник. Когда икона была готова, Обухов привез ее сначала в свой родительский дом, а оттуда «на голове своей перенес в родной храм. Борская икона прославилась благодатными знамениями и чудесами.

Через некоторое время в России стали известны и другие образы «Взыскание погибших». Один из них был написан итальянским мастером и принадлежал московской дворянской фамилии. По преданию, владелец этой иконы был вдов и один воспитывал 3 дочерей. Его молитвы перед образом Пресвятой Богородицы о благополучии дочерей были услышаны: они счастливо вышли замуж, а благодарный отец, как ему было указано в сонном видении, передал семейную святыню в свой приходской храм Рождества Христова в Палашах. Во время разорения французами Москвы в 1812 г. икона была разбита на части и брошена вместе с другим церковным имуществом. После ее обретения была восстановлена стараниями художника Т. Г. Мягкова. После революции прихожане чудом сумели спасти богатую ризу иконы — они принесли из дома ценности, какие у кого были, и откупились от реквизиции. В настоящее время икона находится в церкви Воскресения Словущего на Успенском вражке. Однажды от этой иконы чудесно получила помощь жена арестованного священника, оставшаяся с тремя малолетними детьми. И ею овладели мысли о самоубийстве, и она была остановлена взглядом Богоматери с иконы и последующей молитвой к Ней. А на следующий день матушка обнаружила в сумке сверток  с золотыми червонцами.

Особенность московского образа в том, что волосы Богома­тери не прикрыты ни платом, ни мафорием в нарушение иконописного канона. Не исключено, что именно перед этим образом Лермонтов сложил свою гениальную «Молитву странника».

Известны и другие списки иконы, например: в Санкт-Петербурге в Покровском храме в Мариенбурге, в Самаре в Покровском кафедральном соборе.

«Взыскание погибших» — это икона отцов и матерей, мо­лящихся о своих детях, икона-утешительница родительской скорби. Ее еще называют «Избавление от бед страждущих».

Перед образом «Взыскание погибших» молятся обо всех погибающих и заблудших, о путешествующих, о близких, раз­лука с которыми неминуема.

Тропарь глас 7
Радуйся, Благодатная Богородице Дево,/ во объятиях Своих Предвечнаго Младенца и Бога носившая./ Проси Его дати миру умирение/ и душам нашим спасение./ Сын бо Тебе, Богомати, вещает,/ яко вся прошения Твоя во благое исполнит./ Сего ради и мы припадающе, молим Тя/ и надеющийся на Тя, да не погибнем,/ имя Твое именуем:/ Ты бо еси, Владычице,/ Взыскание погибших.

Кондак глас 6
Предстательство христиан непостыдное,/ ходатайство ко Творцу непреложное,/ не презри грешных молений гласы,/ но предвари, яко Благая, на помощь нас,/ верно зовущих Ти:/ ускори на молитву и потщися на умоление,/ предстательствующи присно, Богородице, чтущих Тя.

Источник — http://hram-troicy.prihod.ru/zhitie_svjatykh_razdel/view/id/34343